Iyaga oo isku diyaarinaya in ay ciidamada Soomaaliya ku tababaraan
waddanka gudihiisa, ayaa ciidanku ka codsaday dadka waddanka gudihiisa
ku bara kacay iyo kuwa sharci darrada ku degan xeryaha milatariga ee
Muqdisho kuyaala inay iskood uga guuraan goobahaas hadii kale xoog ayaa
looqa raridoona marka lagaaro Febraayo 25-teeda.
Janaraal Cabdullaahi Cali Cusmaan, oo ah Taliyaha Guutada labaaad ee
ciidanka masuulka looga dhigay xoraynta aagagga koonfurta-galbeed oo ay
ku jiraan Shabeelada Hoose, Baay iyo Bakool, Gedo, Jubada Dhexe iyo
Jubada Hoose, ayaa u qabtay dadka sharci darrada ku degan iyo kuwa
waddanka gudihiisa ku bara kacay mudo 30 maalmood ah inay guryahoodii
ugu noqdaan.
“Xoog ayaan ku galaynaa guryaha sharci darrada ah haddii aysan
amarkeena u hoggaansamin, waxaanan xidhi doonnaa qof alla qofkii iska
caabin sameeya ama xaaladda ammaanka khalkhal galiya,” Cusmaan ayaa
yiri.
Ciidanka Soomaaliya ayaa hadda degan laba xero oo ku yaala aagagga
Kaxda iyo al-Jasiira ee koonfurta-galbeed ee caasimada, iyada oo
xeryahoodii hore ay dagan yihiin ganacsato maxalli ah oo hubaysan iyo
dadka waddanka gudihiisa ku bara kacay.
“Waxaan leeyahay arrintaasi waa dhamaatay ka dib markay 21 sano ka
faa`iidaysanayeen dhismayaasha dawladda,” ayuu yidhi. “Qof kasta oo
Soomaali ah waa inuu ogaado in ciidanku uu si adag ula dhaqmayo kuwa
degan xeryahooda.”
Cusmaan ayaa sheegay in dawladdu ay qorshaynayso in ay dib u dhisto
isbitaalka milatariga ee Hodan, garoonka milatariga ee ku dhagan
Garoonka Caalamiga ah ee Aadan Cadde, Shiirkole Ofishaale oo ahayd xarun
ay saraakiisha dawladdu ku nasan jireen oo ku taala Hawl-wadaag, iyo
dhamaan xarumaha kale ee ciidamada oo ku yaala degmooyinka Hodan iyo
Dayniile.
Dawladaha saaxiibada ah ayaa ku kaalmaynaya Soomaaliya dhisitaanka
xarumahaas tababarka iyo daryeelka oo loo diyaarinayo ciidamada
Soomaaliya, iyo xarumo kale oo qalabka lagu sameeyo sida warshad cusub
oo lagu samaynayo dharka milatariga ee ay xidhaan saraakiisha iyo
warshad kale oo samaynaysa alaabta gasacadaysan oo loogu tala galay
xubnaha ciidanka qalabka sida, Cusmaan ayaa sidaas sheegay.
Taliyaha ciidanka Soomaaliya Janaraal Cabdiqaadir Sheekh Cali Diini
ayaa ka codsaday dagaal yahaniinta al-Shabaab in ay is dhiibaan si
ciidanka qalabka sida ay xooga u saaraan dhisitaanka xarumaha ciidanka
iyaga oo kaashanaya waddamada shaqo wadaaga lala leeyahay iyada oo
hadafku yahay tababarka iyo qalabaynta ciidanka.
“Ma doonayno in aan wada dilno wiilasheena ku dagaalamaya magaca
Al-Shabaab, kuwaas oo ah koox magac xumaynaysa Islaamka,” ayuu yidhi.
“Hadda waxaan ku sugan nahay xaalad dagaal oo aan kula jirno
argagixisada Al-Qaacida iyo Soomaalida la socota ee waddadii saxda ahayd
ka leexatay,” ayuu sheegay Taliyuhu. “Waxaan cadawga kula
dagaalamaynaa hal gacan anaga oo gacanta kalena ku dhisayna xarumaha
milatariga.”
Waddamada Dereska Nala ah oo kordhinaya kaalmada Ciidanka Soomaaliyeed" Labadii bilood ee la soo dhaafay, ayaa Wasiirka Arrimaha Dibadda
Fawsiyo Yuusuf Xaaji Aadan iyo Wasiirka Difaaca Cabdixakiim Xaaji
Maxamuud Fiqi waxay ku mashquulsanaayeen la kulanka Madaxda Ajaanibta ah
si ay maalgalin iyo taageeraba ugu helaan arrimaha horumarka iyo
ammaanka.
Fowsiyo ayaa ka heshay Talyaaniga kaalmo ah dhinaca garsoorka,
ammaanka iyo horumarka ka dib markii ay Rooma kula kulantay Wasiirka
Arrimaha Dibadda ee Talyaaniga Giulio Terzi di Sant’Agata.
Somaaliya ayaa sidoo kale Turkiga la saxiixatay iskaashi Milatari
Diseembar 6-deedii si loo adkeeyo wadashaqaynta xoojinaysa Ciidanka
Soomaalida, dhidibadana u sii aasaysa xidhiidhka labada waddan ka
dhexeeya.
Hadal ka soo baxay Raadiyaha Turkiga iyo Hay’ada Telefishinka Janaayo
19-keedii, ayaa Fiqi ku sheegay in 120 saraakiil Soomali ah iyo ciidamo
lagu tababari doono sanadkan waddanka Turkiga.
“Ammaanka ayaa ah muhiimada noogu wayn, Al-Shabaabka Soomaliduna ma
aha khatar maxali ah kaliya ee waa mid caalami ah,” ayuu yidhi. “Waa
muhiim in beesha caalamka ay na taageerto ilaa iyo intii aan cagaheena
kaga istaagayno.”
Si ay u sii wado taageerada sugidda ammaanka iyo nabada ee
Soomaaliya, ayaa Wasiirka Turkiga ee Horumarinta Cevdet Yilmaz uu
Janaayo 27-deedii u gudbiyay jeeg $1-milyan ah oo ka socda dawladda
Turkiga Ergada Midawga Afrika ee Soomaaliya..
Diyaarinta Ciidanka Soomaaliya si ay ula wareegaan Nabadgelyada Dalka
Mukhtar Cusmaan Rooraaye, oo ah khabiir Soomaaliyeed ee dhinaca
milatariga, ayaa sheegay in saraakiil Yurub ah oo ka socota Spain,
Jarmalka, Faransiiska, Belgium iyo Holland ay boqolaal ciidan Soomaali
ah ku tababarayaan xero milatari oo u dhaw Kampala, Uganda.
Dawladaha
Suudaan iyo Itoobiya ayaa iyaguna door wayn ciyaaraya iyaga oo ciidanka
iyo booliiskaba ku tababaraya sidii ay ugu jawaabi lahaayeen dagaal
yahniinta lala galayo dagaalada dhuumaalaysiga ah, ayuu yidhi.
Ka dib markii ay Golaha Midawga Yurub kordhiyeen tababarkii dhinaca
Ciidanka Soomaaliya kuna kordhiyeen labo sano bishii Janaayo 22-deedii,
ayay Ergada Tababarka Midawga Yurub ee Soomaaliya (EUTM) sheegtay in ay
“Sii wadi doonto wax ka qabadka xoojinta ciidanka Soomaaliya si ay ugu
dambayntii ula wareegaan mas’uuliyada ammaanka”.
Qiyaastii 3,000 oo ciidamo Soomaali ah ayaa barnaamijka EUTM Soomaliya lagu tababaray ilaa iyo markii la bilaabay Febraayo 2010.
Rooraaye ayaa sheegay in dawladaha saaxiibka ah ay u badan tahay in
ay ugu deeqaan qalab milatari oo casri ah ciidanka Soomaaliya haddii
Qaramada Midoobay ay u codayso in laga qaado cunaqabataynta hubka ee
Soomaaliya saarnayd taniyo 1992.
“Sababo la xidhiidha niyad adaygooda iyo go’aankooda adag, ayay
ciidanka Soomaaliya, kaas oo aan haysanin taangiyo, madaafiic, gawaadhi
gaashaaman ama dhar milatari, ula dagaalamayaan cadaw dambiile ah oo
doonaya inay burburiyaan ayna argagixiyaan dadkooda iyo dhamaan shacabka
waddamada Bariga Afrika, gaar ahaan Kenya, Itoobiya, Ugaandha iyo
Burundhi,” Rooraaye ayaa sidaa ku doodaya
_____________________________Xafiiska Shabakada warcadnet
Usa-Alaska
ceelka@gmail.com
www.warcadnet.blogspot.com
Facebook Blogger Plugin by deercali.blogspot.com | Get Widget
Posted by , Published at 22:30 and have
