Dableyda hubeysan ayaa gudaha u galay Maxkamada, iyagoo rasaas aan loo meel dayin furayay ka hor inta aanay is qarxin labo ruux oo jaakadaha qarxa xirnaa.

Garsoore Maxkamadeed iyo tiro garyaqaano maxkamadeed ayaa la rumeysan yahay inay ku dhinteen weerarka, halka 24-kalena ay ku dhaawacmeen.

Taliyaha Booliska Islamabad Sikandar Hayat ayaa sheegay in labo ka mid ah dableydii weerartay dhismaha Maxkamada ay is qarxiyeen markii ay hareereeyeen ciidamada booliska.

Isbitaalada ku yaal magaalada Islamabad ayaa xaalad heegan ah la geliyay, iyadoo ammaanka si aad ah loo adkeeyay.

Islamabad ayaa ah meelaha ugu ammaaanka fiican Pakistan, iyadoo si aad ah loo ilaaliyo, waxaana weerarkan uu ku soo aadayaa maalin kadib markii Ururka Taliban uu ku dhawaaqay xabad joojin bil ah.

Dowladda Pakistan ayaa iyana sheegtay inay joojineyso weerarada cirka ee ka dhanka ah Ururka Taliban, waxaana dhowrkii todobaad u socday wada hadalo nabadeed.

Ilaa iyo hada ma jirto cid sheegatay weerarkan lagu qaaday magaalada Islamabad oo ah kii ugu dhimashada badnaa sanooyinkan.