daajis.com:-Tababaraha kooxda Arsenal
Arsene Wenger oo maanta u dabaal dagayey kulankiisii 1000-aad ee uu
leyliyo Gunners ayaa guuldarro lagu soo dhaweeyey markii nus darsan
goolal ah 6-0 looga adkaaday ciyaar ka dhacday garoonka Stamford Bridge.
Ciyaarta ayaa kooxda martida ahayd ee
Arsenal la boobsiiyey qeybtii hore ee ciyaarta, waxaana Chelsea ay ku
qaadatay inay hoggaanka ciyaarta qabato shan daqiiqo oo qura, waxaana
shabaqa tagay weeraryahanka kooxdaasi Samuel Eto’o, kaddib caawin uu ka
helay Andre Schürrle.
Labo daqiiqo kaddib ayey goolka labaad
la timid Chelsea, waxaana u dhaliyey daqiiqadii 7-aad ee bilowgii
ciyaarta, xiddigii caawiyey goolkii hore ee Andre Schürrle.
Ciyaarta oo socta daqiiqadii 10-aad ayaa
waxaa ciyaarta ka baxay weeraryahanka kooxda Chelsea ahna dhaliyaha
goolka hore Samuel Eto’o, kaddib dhaawac muruqa ka soo gaaray, waxaana
lagu bedelay Fernando Torres.
Daqiiqadii 15-aad The Blues ayaa heshay
goolka saddexaad oo ahaa rigoore kaddib markii kubbad uu soo tuuray
Hazard oo goosha ku socotay uu gacan ku bixiyey xiddiga kooxda Arsenal
Alex Oxlade-Chamberlain.
Rigoore lagu abaalmariyey Chelsea waxaa
gool u bedelay daqiiqadii 17-aad Hazard, balse waxaa la yaab lahayd in
Chamberlain oo kubadda si cad caganta ugu bixiyey isagoo ku jira goolka
uu ciyaarta sii watay laakiin garoonka laga saaray Kieran Gibbs markii
kaarka cas loo taagay.
Chelsea oo galabta isaga socotay goolka
Arsenal ayaa kan afaraad la timid daqiiqadii 42-aad inta aan la’aadin
qeybta nasashada waxaana kubbad uu soo dhigay Fernando Torres gool u
bedelay Oscar, ciyaarta ayaana lagu kala nastay Chelsea oo ku
hoggaaminaysa 4-0.
Markii dib la isugu soo laabtay qeybtii
dambe ayaa waxaa goolka shanaad mar kale u dhaliyey Chelsea da’yarkeeda
Oscar daqiiqadii 66-aad, kaddib kubbad uu ka tuuray afka hore ee
diillinta ganaaxa.
Goolka lixaad ee ugu dambeeyey waxaa ka
dhaliyey Arsenal daqiiqadii 71-aad oo ciyaarta ku soo xiray Mohamed
Salah oo bedelay ku soo galay ciyaarta laguna belay Oscar, kaddib karoos
wacan oo uu ka helay Nemanja Matic, waana goolkiisii ugu horreeyey oo
uu Salah u dhaliyo Chelsea.
Jose Mourinho oo marnaba guuldarro kala
kulmin macallinka Arsenal Arsene Wenger toban jeer ay kulmeen iyagoo
kala wata Arsenal iyo Chelsea ayaa galabta mar kale laga adkaaday Wenger
oo u dabaal dagaya kulankiisii 1000-aad ee uu layliyo Gunners, taasoo
noqoneysa in Jose aan laga adkaan 11-kulan oo ay kulmeen Wenger iyagoo
kala hoggaaminaya Arsenal iyo Chelsea, waxaana lagu soo dhaweeyey nus
darsan goolal ah.
Chelsea ayaa sidaas ku dheereysatay
dhibcaha ay ku heyso hoggaanka horyaalka England, waxa ayna leedahay
69-dhibcood, halka Liverpool oo ku jirta kaalinta labaad oo caawa
ciyaareysa ay leedahay 62-dhibcood.
Daawo Sawirrada:-
RAYIGAAGA KADHIIBO:-
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 22:08 and have
