Cali Dheere ayaa sheegay in weerarkaas ay kaga gubeen ilaa saddex gaari, halka labo gaari ka soo qafaasheen, isla markaana ay kaga dileen askar badan sida uu yiri.

"Dhowr mar ayaan Kenya u dignay oo aan dhahnay war nadaaya oo joojiya ciidankiina nagu soo duulaya dalkeena faraha nooga qaada balse way ka dhega adeygtay wixii maanta dhacay iyo kuwii ka horreeyay waa qeyb yar oo ka mid ah jawaab celinta mujaahidiinta"ayuu yiri Cali Dheere.

Waxaa uu mar kale ku celiyay fariin hore ugu diray kenya oo ahaa in Amniga Kenya uu ku xiran yahay Amniga Soomaaliya, hadii aanay ka bixina ay weerarada ku sii badan doonaan sida uu hadalka u dhigay.

"Amnigiinnu wuxuu ku xiran yahay amniga shacabka Soomaaliyeed in aad dadkeena laysaan oo xataa beeraheena duqeysaan idinna aad nabad gashaan waa wax aan socanayn"ayuu yiri Sheekh Cali Dheere.

Cali Dheere oo sii hadlayay ayaa yiri "hadii aad rabtaan dalka nooga baxa, sida aad noola dhaqanteen ayaa idinla dhaqantay, wax badan waa weerareen mujaahidiinta, in fara badan waa ku wajahan tahay, hadii aysan ka bixin dalkeena".

Jimcihii la soo dhaafay ayay aheyd markii labo qarax oo is xigay uu ka dhacay suuq ku yaal magaalada Nairobi, halkaasoo ay ku dhinteen ilaa 12 ruux, halka 70 kalena ku dhaawacmeen.

Kenya oo amnigeeda faraha ka baxay ayaa waxaa heegan la geliyay ciidankeeda, iyadoo la adkeeyay ammaanka xarumaha safaaradaha reer galbeedka ku leeyihiin magaalada Nairobi.