daajis.com:-Saraakiisha caafimaadka ee Falastiiniyiinta ayaa sheegay in weerar
ay maanta Marinka Gaza ka geysteen diyaaradaha dagaalka iyo taankiyada
Israel ay ku dhinteen ugu yaran boqol qof, xilli militariga ay soo
xoojinayaan olole uu Raiisul Wasaaraha Israel Benjamin Netanyahu uu ka
digey inuu waqti dheer qaadan karo.
Mas’uuliyiinta ayaa sheegay in tirade guud ee dhimashada ay haatan
dhaaftey 1,100 oo u badan dad rayid ah, kadib markii weeraro baahsan oo
cirka ay ciidamada Israel ka fuliyeen Gaza saddexdii toddobaad ee la soo
dhaafey.
Mid ka mid ah weerarada cirka ee maanta dhacay ayaa sababey inay
xiranto warshaddii korontada ee Gaza. Weerarkan ka hor ayaa korontada
magaalada la siiyo waxay ku koobneyd saddex saacadood oo qura
maalintiiba.
Raiisul Wasaaraha Israel Benjamin Netanyahu ayaa sheegay in
hawlgalkan aanu soo afjarmi doonin ilamaa ciidamada Israel ay ka
burburiyaan khadadka dhulka hoostiisa ee maliishiyada Xamaas u
adeegsadaan inay ugu soo gudbaan gudaha Israel si ay weeraro uga
geystaan.
Milatariga Israel ayaa sheegay in dagaalyahannada Hamas oo
istcimaalaya waddooyinkan dhulka hoostiisa ay maanta dileen shan askari
oo reer Israel ah.
Tirada guud ee ciidamada Israel kaga dhimatey hawlgalkan ayaa gaareysa 53 askari.
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 22:49 and have
