Ciidamadan ayaa isugu jira Milateri iyo Nabadsugid ayaa ku hubeysan gaadiidka dagaalka, iyagoo isku dhiririyay xaafadaha qaar ee ay iska hor imaadyada habeenadii u dambeeyay ka dhacayeen, halka fariisimo ciidamada dowladda degmadaas ku lahaayeen la xoojiyay.

Gudoomiyaha degmada Huriwaa Cumar C/lle Jacfaan oo todobaadkii hore sheegay in degmadiisa ay halis ugu jirto inay gacanta ka baxdo ayaa xaqiijiyay in ciidamo badan soo gaareen degmada si ay ammaanka u sugaan.

"Dowladda ciidamo badan ayay u soo dirtay Huriwaa, si looga hortago falalka ammaan darida, ay geysanayaan kooxaha nabad diidka, xaalada degmada waa caadi"ayuu yiri Cumar Jacfaan oo rajo ka muujiyay in ciidamadan inay sugi karaan ammaanka.

Sidoo kale Gudoomiye kuxigeenka dhinaca Ammaanka Warsame Maxamed Xasan (Joodax) ayaa isna xaqiijiyay in ciidamo badan la geeyay degmada Huriwaa, si ammaanka iyo xasiloonida loo soo celiyo.

Xoogag ka tirsan Al-Shabaab ayaa xilliyada habeenkii dhaq dhaqaaq ka waday, iyagoo aad u soo buuxiyay degmada, waxaana dhowr habeen dhacay iska hor imaad toos ah oo lagu qaaday xarumaha ciidamada ku leeyihiin degmadaas.

Tan iyo markii ay degmada ka dhaceen dagaalo iyo duqeyn ayaa waxaa ka barakacay shacabkii degenaa saddex sano kadib, waxaana taas ay keentay in xaalada degmada ka dhigto mid aan deganeyn.