daajis.com:-Kooxda Barcelona ayaa
Real Madrid kaga adkaatay gurigeeda Bernabeu, ciyaartii El Clasico oo ku
dhammaatay 4-3, iyadoo uu rikoor cusub dhigay Lionel Messi kaddib
markii uu dhaliyey goolasha saddexleeyda.
Goolka waxaa la horreysay kooxda martida
ahayd ee Barcelona, waxaana ay ku qaadatay kaliya todoba daqiiqo inay
hoggaanka u qabtaan ciyaarta, markii darbo xooggan uu shaqaba dhigay
Andrés Iniesta, kaddib baas cajiib ah oo uu ka helay Lionel Messi.
Real Madrid ayaa goolkaas iska soo
gudday markii uu shabaqa tagay Karim Benzema oo madax daba mariyey
goolhayaha Barca, kaddib karoos qurux badan oo uu ka helay xiddiga caawa
ciyaarta sida aadka ah uga dhexmuuqday ee Angel Di Maria, ciyaarta
ayaana noqotay barbaro 1-1.
Karim Benzema ayaa Real Madrid hoggaanka
u dhiibay daqiiqadii 24-aad ee qeybtii hore, markii karoos kale oo uu
ka helay Di Maria uu ku koontoroolay xerada ganaaxa islamarkaana uu
shabaqa dhigay darbo xoogan.
Barcelona ayaa goolka barbaraha heshay
dhammaadkii qeybtii hore ee ciyaarta daqiiqadii 42-aad, waxaana u
dhaliyey Lionel Messi, goolkaas ayaana ka dhigay Messi xiddiga ugu
goolasha badan taariikhda kulmada El Clasico marka la isku geeyo
dhammaan tartammada, ciyaarta ayaana lagu kala nastay qeybtii hore
barbaro 2-2.
Markii dib la isugu soo laabtay qeybtii
dambe ayey labada dhinac la soo galeen weeraro deg deg waxaana hoggaanka
la wareegay xiddigaaha Real Madrid kaddib rigoore uu u dhaliyey
Cristiano Ronaldo daqiiqaddii 55-aad, markii uu diillinta ganaaxa
dhexdeeda ku jillaafay Daniel Alves.
Lionel Messi ayaa goolkaas u barbareeyey
mar kale Barcelona ciyaartana ka dhigay 3-3, waxaana uu ka dhaliyey
Real Madrid rigoore lagu galay Neymar oo kaarka cas lagu siiyey Sergio
Ramos oo ka tirsan Real Madrid daqiiqaddii 65-aad, waxaana goolkan uu
Messi ku barbareeyey xiddigii hore ee Real Madrid Hugo Sánchez kaasoo
ahaa xiddiga labaad ee ugu goolasha badan La Liga.
Lionel Messi ayaa hoggaanka u dhiibay
Barcelona daqiiqadii 84-aad ee dhammaadkii ciyaarta markii uu dhaliyey
goolasha saddexleyda loo yaqaan kaddib rigoore kale oo lagu galay Andrés
Iniesta, waxaana uu dhigay Messi rikoor cusub isagoo noqday
ciyaaryahanka labaad ee ugu goolasha badan taariikhda La Liga, ciyaartii
ka dhacday garoonka Bernabeu ayaana ku soo dhammaatay 4-3 oo lagu
dardaray Real Madrid.
Barcelona ayaa hadda sidaas ku leh
69-dhibcood inkastoo ay ku jirto booska saddexaad, haddana waxaa ka
sarreeya Real Madrid iyo Atletico Madrid oo wadaa min 70-dhibcood.
Daawo Sawirrada:-
Daawo Sawirrada:-
source: goolfm
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by 05:08 and have
, Published at