daajis.com:-Kooxda Liverpool ayaa
guul weyn ka gaartay naadiga Man United ciyaar ka dhacday garoonka
kooxda United ee Old Trafford, ciyaar ku dhammaatay 3-0, iyadoo kooxda
Man U ay ku ciyaaraysay 10 ciyaaryahan markii laga qaatay kaarka
guduudan.
Goolka hore waxa uu ahaa rigoore loo
dhigay kooxda Reds waxaana u dhaliyey kabtankooda Steven Gerrard
daqiiqadii 34-aad, markii uu isagoo ku jira diillinta ganaaxa kubbad
gacan ku taabtay daafaca Man United ee Rafael, ciyaarta ayaana lagu kala
nastay 1-0 oo ay ciyaarta ku hoggaaminaysay Liverpool.
Markii dib la isugu soo laabtay qeybtii
labaad ee ciyaarta ayaa mar kale waxaa rigoore loo dhigay Liverpool
waxaana mar kale u saxiixay kabtankooda Steven Gerrard, daqiiqadii
46-aad.
Mar kale ayaa rigoore saddexaad loo
dhigay Liverpool, waxaana goolkaas ka lumiyey Steven Gerrard oo kubbadii
uu tuuray birta ku dhiftay, waxaana rigooradaas roose ku qaatay
kabtanka Man United Nemanja Vidic oo qaladkaas galay.
Ciyaarta oo socota daqiiqadii 84-aad
ayaa waxaa Man United ka dhaliyey goolka saddexaad weeraryahanka kooxda
Liverpool Luis Suarez, kaddib kubbad dhexbixis ah oo uu ka helay
saaxiibkiis Daniel Sturridge, ciyaarta ayaana ku soo dhammaatay 3-0 oo
lagu dardaray Man United oo mininkeeda joogta.
Kooxda Liverpool waxaa ugu dambeysay in
Old Trafford ay ku badiso sanadkii 2009-kii markaas oo Liverpool ay ku
adkaatay 4-1, waxaana kaarka roosaha ee la siiyey Vidic uu noqonayaa
kaarkii 15-aad ee laga bixiyo kulanka kooxahan dhex mara.
Liverpool ayaa haatan soo gashay
kaalinta labaad ee kala horreynta horyaalka, waxaa ay leedahay
62-dhibcood, afar dhibcood ayeyna ka dambeysaa Chelsea, inkastoo wali
hal kulan uu baaqi u yahay Reds.
Daawo Sawirrada:-
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 00:54 and have
