daajis.com:-Xaflad ballaaran oo lagu soo dhoweynayay Madaxweynaha Jabuuti
Ismaaciil Cumar Geelle ayaa xalay ka dhacday magaalada Minneapolis ee
gobolka Minnesota, waxaana munaasabadan ay aheyd mid ay si wada jir ah
ugu soo wada qeybgaleen kumanaan ka mid ah jaaliyadda Soomaaliyeed iyo
Jabuuti.
Ismaaciil Cumar Geelle oo xafladdaasi si qiiro leh ula hadlay
Jaaliyadda Soomaaliyeed ee Mareykanka iyo Jabuuti, isagoo si gaar ah ula
dardaarmay kuwa Soomaaliyeed in ay muujiyaan wadajirka Soomaalinimo iyo
midnimo.
“Qurbo-joogta waa la xantaa, hase ahaatee maadaama ay maanta
Soomaaliya ugu nasiib wanaagsan tahay waxaa la idinka rabaa inaad
midnimo yeelataan, waayo qaran iyo qabiil meel ma wada galaan” ayuu yiri
Madaxweyne Ismaaciil Cumar Gelle.
“Shalay waxaan la sheekeysanayay madaxweynaha South Sudan, wuxuuna ii
sheegay inay yihiin 65 qolo oo mid kasta afkiisa iyo diintiisa leeyahay
taasina waxay kuu muujineysaa in Illaahey uu jecelyahay dadka
Soomaaliyeed, waayo wuxuu ka dhigay dad hal qabiil ah oo hal af ku
hadla” ayuu sii raaciyay Madaxweynuhu.
Madaxweyne Ismaaciil Cumar Geelle wuxuu sheegay in dowladda iyo dadka
Jabuuti aysan marnaba joojin doonin taageera ay la garab istaagan
yihiin shacabka Soomaaliyeed. isagoo si qiiro leh u yiri “Na weydiista
wixii aad u baahan tihiin”.
Mar uu ka hadlayay Ciidamada Jabuuti ee ku sugan Somalia ayuu sheegay
in ay dhawaan kordhin doonaan tirada kaga sugan Somalia ilaa laga
sifeynayo ama laga baabi´inayo Al-Shabaab ay sii joogi doonaan.
Jaaliyada Soomaalida ayaa guddoon siisay bilad sharaf lagu soo qoray
HIIL WALAAL, oo loola jeeday ciidamada kaga sugan Hiiraan oo la magac
baxay HIIL WALAAL.
Ugu danbeyntii wuxuu kula dardaarmay Jaaliyadda Jabuuti ee kulankaasi
kasoo qeybgalay in ay walaalahooda Soomaaliyeed la garab galaan
dadaalka ay ugu jiraan nabadda iyo horumarka dalkooda.
“Taageeradii dadka Soomaaliyeed ay na siiyeen lama hilmaami karo,
sidaa daraadeed la garab gala dadaalka ay ku jiraan dadka Soomaaliyeed”.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by 02:28 and have
, Published at