Kooxda heysata horyaalka Spain ayaa xaqiijisatay booskooda finalka koobka iyagoo ka talaabsaday Blaugrana, waxaana da’ yarka Faransiiska ah uu ku faraxsan yahay qaab ciyaareedka kooxdiisa.

“Waan faraxsanahay, marka aan sidaas u ciyaarno koox ahaan, waan ognahay inaan badin karno mar walba” ayuu ciyaaryahanka u sheegay website-ka kooxdiisa.

“Haatan waa inaan hore u soconaa oo aan ka fekernaa finalka iyo kulamada kale ee soo socda. Barcelona waa koox ay adag tahay in kubada laga difaacdo sababtoo ah waxa ay heystaan ciyaartoy aad u dheereeya, sidaasi darteed si isku xiran ayaan u ciyaarnay boosna uma aanan furin.”

19 jirkaan ayaa sidoo kale amaan badan ku helay qaab ciyaareedkiisa labada lug ee semi-finalka ee uu Barcelona ka horyimid, waxaana uu dareesan yahay in kulamada cadaadiska sarre inay faa’ido u tahay mustaqbalkiisa ciyaareed.

“Waxaan isku dayaa inaan horumar sameeyo oo aan wax barto, taas ayaana u fiican mustaqbalkeyga ciyaareed. Waxaan diyaar u ahay inaan ciyaaro oo aan caawiyo kooxda, waana waxa aan halkaan u joogo.”

Madrid ayaa mar kale la kulmeysa Barca sabtida kulan horyaalka ka tirsan oo ka dhacaya Santiago Bernabeu.