daajis.com:-Laxda weyda ah ma rabee wanka buuran ii keena, waa cinwaan aad ka
dareemi kareyso farriin cabasha ah oo ku wajahan qof kasta amaba
muwaadin kasta oo Soomaaliyeed oo wax un ka tari kara qeyladhaanta ay
farriintani xanbaarsan tahay ama ay soo gudbineyso.
Taariikhdu waa ma guuraan dhaxal reeb ah oo jiilba jiilkiisa taabsiisa
xaqiiqada dhabta ah iyo sooyaalka taxanihii la soo maray, sidaasi
darteed halgankii xornimo doonka iyo gumeysi iska caabinta ahaa ee ay
ummadda Soomaaliyeed gaashaanka u soo qaadatay, waxaa hormuud ka ahaa oo
laga shidaal qaadanayay guubaabada hooballada Soomaaliyeed.
Dabcan daah ma saarna wax qabadkii fannaaniinta Soomaaliyeed, waayo maba
ay jirin, waran, fallaar iyo qori xabbad laga riday oo aanay la soconin
guubaabo qiiro leh iyo dhiirri gelinta hoobalka Soomaaliyeed, taas
ayaana keentay xorriyadda aynu maanta hoos harsaneyno, waxaana taa farta
ku fiiqay oo tusaale sax ah ka bixiyay barbaariye abwaan Maxamed
Warsame ( Hadraawi ) oo tixo kooban ku yiri:-
Xamar iyo hargeysaba
Dhagax iyo hangooliyo
Heellaa xoreysee
Wallee hoobalkoon jirin
Libi soo ma hoyateen.
Waa xaqiiqo dhab ah taasi, waayo shaqsi kasta oo maanta maamul ama xukun
hayaahi, wuxuu dhaxlay xorriyaddii ay dhaliyeen fannaaniinta
Soomaaliyeed, sidaa darteed abaal gud bey ka mudan yahiin hooballada
mas’uul kasta oo xil qaran kursiga ugu fadhiya iyo weliba maamuus la
maqaam ah heerka ay joogaan kuwa iyaga la midka ah ee dunida guudkeeda
ku la nool, howraar baana oraneysa:-
Abaal ninkii galaaba
In loo gudaa gar weeye.
Nasiib darradu waxey tahay weli wey dhiman tahay in ay timaaddo u
damqashada dareen laxaweedka aartaha iyo garashada iftiimineysa waxa ay
suugaani tahay ama ay tarto, garashadaasi oo ka soo fuleysa hadba qofka
aqoontiisa guud heerka ay mareyso iyo dooqiisa faneed halka uu
gaarsiisan yahay iyo weliba siyaasad ahaan sida uu suugaanta ugu
ugaarsan karayo marka la raad goobayo sirta dahsoon ee uu afmaalku
tilmaamo.
Si kastaba ha ahaatee, waqtiga haatan la joogo hooballada amaba
fannaaniinta qaranka Soomaaliyeed ma jirto marxalad ay ka liitaan oo ay
ka il daran yihiin, taariikhdoodana ma ay soo marin duruufaha saxariirta
leh ee laga sii jeestay iyo bahdilaadda ay maanta ku nool yihiin ee
aanay jirin cid uga garaabeysa, taasoo u dhiganta "Dameerkii lagu ilmo
korsaday ee markii uu garba beelay laga abaal ka dhacaye suuqa iyo
dariiqyada daryeel la'aanta ugu geeriyooday!”.
Hooballada Soomaaliyeed ee aan 22kii sano ee uu burburka aan dalka ka
soo bixin, waxey la soo kulmeen dhibaatooyin aan xad laheyn, dalka
gudihiisa ayey dhowr jeer ku bara kaceen qaar baa weli ku jira xeryaha
barakacayaasha, qaarna cudurro iyo gaajo ayey la jiifaan, waxaa la is
weydiiyay “meyd yaa u danbeeyay?” markaasi ayaa isku mar lagu wada
jawaabay “ midkaa hadda la sii sido!”.
Fannaaniinta qaranka ku hoos dhibaateysan ee aan waxba loo qaban waxaa u
danbeeyay:- Sahra Ileeye oo xanuun aad ah la il daran iyada oo weliba
heysay toddoba carruur ah oo uu ka geeriyooday fannaankii weynaa ee ahaa
Axmed Nuur Jaango kuwaasi oo aanay jirin cid ku caawineysa, sidoo kale
waxaa jira fannaan Cabdi Tahliil Warsame oo isaguna gurigiisa ku dhex
xanuunsanaya iyo qaar kale oo xeryaha barakacayaasha ku dhex
darxumeysan!, waxaana yaab leh iyada oo aan mas’uuliyaddaasi la eegin in
haddana ay madaxda qaranka u gacan haatinayaan fanaaniinta ku kala nool
yurub iyo mareykanka iyaga oo leh kaalaya oo soo laabta waan idin soo
dhoweyneynaaye, taasoo la macna ah “ laxda weyda ah ma rabee wanka
buuran ii keena” kaas oo isaguna berrito marka lagu dan gaaro aan dib
danbe la isu weydiin doonin!.
Dowlad aan laheyn fan iyo farshaxan qabyo ayey dhex dabaalaneysaa,
haatan oo ku meel gaarkii laga soo baxayna madaxda qaranka waxaad moodda
in ay ka sii jeedaan howlaha fanka iyo weliba horumarinta hiddaha iyo
dhaqanka, waayo waxaa muuqata in la iska indha tiray horay u
dhaqaajintii golihii murtida iyo madadaalada, mana garan karno sababaha
looga maarmay adeegsiga awoodda suugaanta oo ah quwad aan wax tarkeeda
la dafiri karin taasoo mas’uulkii kasbada u ah indho iyo dareen
siyaasadeed wax tusaaleeya, kii aan kasbaninna ku noqota qodxo berrito
dariiqa u sii daadsan!.
Ugu danbeystii dowladda maanta jirta waxaan ugu duceynayaa “alla ha idin
tuso awoodda qarsoon ee suugaanleyda soomaaliyeed” bah weynta
fannaaniinta Soomaaliyeedna waxaan leeyahay “meel kasta oo aad dunida ka
joogtaanba, waxaa idinku waajib ah in aad idinku is ogaataan oo aad is
daryeeshaan idinka oo isku duuban, waayo afkiinna iyo maskaxdiinna
ayaaba ah jeeg wareega oo mel walba ka sarrifmaya, kaas oo qof iyo
qaranba ku filan, waxaadna ogaataan haddeydan sidaa yeelin, ineysan cidi
idiin maqneyn ceelna idiin qodneyn!”
_____________________Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by 04:30 and have
, Published at