daajis.com:-Shirweyne ay isugu yimaadeen xubno ka soo jeeday Beelaha H/gidir oo
isugu jiray Odayaal, aqoonyahanno, Siyaasiin, ganacsato masuuliyiinta
maamullada gobollada iyo Xildhibaano ka soo jeeda gobollada dhexe oo
looga hadlayey sidii dib u heshiisiin looga
dhallin lahaa deegaannada gobollada dhexe ee Soomaaliya ayaa maanta lagu
qabtay magaalada Muqdisho.
Shirweynahan dib u heshiisiinta dadka degan deegaannada gobollada
dhexe, ayaa waxaa ka soo qeyb-galay dhammaan waxgaradka iyo madaxda ka
soo jeedda deegaannadaasi, waxaana looga arrinsanayey sidii dib u
heshiisiinta loo gaarsiin lahaa dhammaad deegaannada gobollada dhexe ee
Soomaaliya, si loo helo nanad waarta iyo maamul loo dhan yahay oo ay
helaan dadka gobolada dhexe.
Ugu horeyn waxaa ka hadlay shirweynahan guddoomiyaha cusub ee guddiga
dib u heshiisiinta gobollada dhexe Imaam Bashiir Salaad (Dhoolayare),
waxa uuna ugu baaqay dhammaan dadka ka soo jeeda deegaannada gobollada
dhexe in ay u diyaar garoobaan shirweyne guud oo dib u heshiisiin ah,
kaas oo ka dhici doona degmada Cadaado ee gobolka Galgaduud, si nabadda
iyo dhisidda maamul loo dhan yahay loo gaaro.
Guddoomiyaha guddiga Dib u heshiisiinta Qaranka, Mudane Ismaaciil
Macallin Muuse oo isagana shirkii maanta ka qeyb-galay ayaa si weyn uga
mahadceliyey dhammaan dadka Soomaaliyeed ee ka soo jeeda gobollada dhexe
ee dalka sida ay u garteen in ay abuuraan jawi dib u heshiisiinneed oo
hormuud u noqda wax wada qabsi iyo horumar, waxa uuna ugu baaqay dadka
Soomaaliyeed in ay arrintan ku daydaan.
Ugu dambeyntii Xildhibaan Cabdisamad Macallin Maxamuud oo ah mudane
ka tirsan Barlamaanka Soomaaliya oo ka soo jeeda gobollada dhexe, ayaa
tilmaamay in masuuliyiinta dowladda ka tirsan ee gobollada dhexe ka soo
jeedda ay diyaar u yihiin in ay taageeraan shirarka dib u
heshiisiinneed, waxa uuna si gaar ah uga mahadceliyey guddigii qaban
qaabada shirweynaha.
Xildhibaannadii shirweynaha ka qeyb-galay oo uu ka mid
yahay Xildhibaan Cabdulqaadir Cali Cumar, ayaa ugu baaqay dadka degan
gobolka Shabeellada Hoose in ay ka qeyb-qaataan xasiloonimada iyo dib u
heshiisiinta, si looga gudbo colaadaha dabada dheeraaday.
Shirweynihii maanta ayaa waxaa lagu go’aamiyey in 15-ka bishan la
diro guddiga dib u heshiisiinta si ay u tagaan magaalada Cadaado oo ah
halka shirweynaha guud lagu qaban doono, waxaana 15-ka ilaa 30 bishan
June la qaban qaabin doona shirka si loo soo gabagabeeyo dib u
heshiisiinta.
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 00:50 and have
