daajis.com:-Xulka Brazil oo marti gelinaya Koobka aduunka 2014 ayaa u soo gudbay
wareega afar dhamaadka ee Sema Finalka, kadib markii ay garaaceen xulka
Colombia ciyaartii wareega 8-da ee ka dhacday Fortaleza.
Ciyaartan ayaa aheyd mid si gaar ah isha loogu hayay labada xidig ee u
kala safta Brazil iyo Colombia ee kala ah Neymar iyo James Rodriguez.
Daqiiqadii 7aad ee qeybtii hore ciyaarta ayaa Brazil waxaa hogaanka u
dhiibay Kabtankooda Thiago Silva, kadib markii kubad kooner aheyd uu
lugta la helay, dabadeedna shabaqa gashay, waxaana Brazil ay ku qabatay
ciyaarta 1-0.
Fursado dhowr ah ayaa Brazil oo ay hogaanka ku soo dheereysan kareen
waxaa ka qasaariyay ciyaaryahan Hulk oo tiro dhowr jeer uu goolhayaha
Colombia kubado ka bad baadiyay.
Ciyaaryahan Fernandinho ayaa ahaa ninka ugu qaladka badan, isagoo
dhowr jeer qalad ku galay, waxaana uu ka soo baxay kaalintiisa oo ku
aadan inuu kubadaha ka ilaaliyo xidiga Colombia James Rodriguez.
Qeybtii hore ciyaarta oo ay Brazil ku hogaamineysay 1-0, ayaa qeybtii
hore lagu kala nastay, iyadoo kubad heysashada laga watay Colombia oo
aad ugu dhibanaa inay jaanta isla heleen.
Qeybtii labaad ciyaarta ayaa markii la isku soo laabtay dar dar
xoogan ay la soo baxday Colombia, waxaana bedelo badan ay sameeyeen
Colombia ku guuleysteen inay kubada la wadaagaan Brazil, inkastoo
garsooraha ciyaarta u muuqday mid isku fasaxayay oo qaladaad badan oo
jiray aanu dhigeyn.
Daqiiqadii 68aad ayaa kubad laad xor aheyd ayaa waxaa si cajiib ah u
dhaliyay David Luiz, waxaana goolhayaha Colombia ku adkaatay inuu
kubadaas bad baadiyo, iyadoo Brazil hogaanka ku qabatay 2-0.
Inkastoo ciyaarta xamaasadeeda ay marba marka ka dambeysa sii
kululaaneysay ayaa Colombia waxaa ay heleen rigoore, kadib markii
Goolhayaha Brazil Julio Cesar uu qalad ku galay mid ka mid ah
weeraryahanada Colombia.
Ciyaaryahan James Rodriguez ayaa rigooradaas gool u bedelay, isagoo
meel cidlo u diray goolhaye Cesar, waxaana ciyaarta ay noqotay 2-1,
iyadoo Colombia u arkeysay goolkaas mid rajadeeda soo celinaya, hadii ay
gool labaad helaan.
James Rodriguez ayaana ah ninka ugu goolasha badan Koobka aduunka,
isagoo dhaliyay lix gool, waxaana uu labo gool ka sareeyaa
ciyaaryahanada Messi, Neymar iyo Muller oo min afar gool leh.
Daqiiqadihii u dambeeyay ciyaarta ayaa Brazil waxaa ka dhaawacmay
xidigooda Neymar oo garoonka looga saaray bareelo, markii ciyaaryahan
Zuniga uu dhabarka jilib ugu dhiftay, waxaana lagu bedelay daafaca
Henrique.
Brazil ayaa markaas wixii ka dambeysay gashay cabsi, iyadoo difaac
xirtay, waxaana kubado dhowr ah oo lagu soo qaaday goolkooda ay iska bad
baadiyeen, waxaana ciyaarta ay ku idlaatay 2-1 oo ay ku badisay Brazil.
Xulka Brazil ayaa gaaray Sema Finalka Koobka Aduunka muddo 12-sano
kadib, waxaana labadii Koob aduun ee 2006 iyo 2010 lagu soo reebayay
wareega 8-da, waxaana markan ay rajo ka qabtaa inay ku guuleysato Koobka
aduunka markoodii 6aad.
Brazil ayaa waxay isku beegmeen wareega afar dhamaadka ee Sema
Finalka xulka Germany oo ka soo badiyay France, waxaana labadan xul koob
aduun oo ay isaga hor yimaadaan ay aheyd Final-kii Koobka aduunka ee
2002 lagu qabtay Korea iyo Japan, xilligaasoo Brazil ay ka qaaday
koobka, markii Ronaldo uu labo gool ka dhaliyay.
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 06:05 and have
