daajis.com:-Muwaadiniin Soomaaliyeed oo ku xiran garoonka kubadda cagta Kasarani
ee Nairobi ayaa ka cabanaya dhibaatooyin dhinaca nolosha ah oo xabsiga
ku haysta, iyagoo sheegay inay ilaalada garoonkaas ay mar walba
garaacaan.
Garoonka Kasarani ayaa tani iyo bishii Abriil ee sannadkan wuxuu ahaa
goob ay ciidamada Kenya ku xiraan dadka Soomaalida iyo ajaanibta kale
ah ee ay kusoo qabqabtaan howlgallada ka socda magaalada Nairobi.
“Dhibaato aad u daran ayaa halkan nagu haysata, waxaan haystaa
warqado aan wax kaga barto dalkan, ciidamaduna way diideen inay
warqadahaas igu tixgeliyaan, halkaanna waxaan ku xirannahay muddo bil
ah,” ayuu BBC-da u sheegay wiil Soomaaliyeed oo lagu magacaabo C/qaadir.
Wiilkan ayaa sheegay in xabsiga ay ku hayso nolol xumo, ayna ciidanka
ula dhaqmaan si aad u fool xun, isagoo xusay in dadka garoonkan
maxaabiista ku ah inay ku jiraan gabdho Soomaaliyeed oo habeen iyo
maalin isaga dhex ooyaha xabsiga, iyaguna aysan waxba u qaban karin.
“Ma jirto cid noo timid, dowladda Soomaaliyana way u jeeddaan in
dalkaan lagu dhibaateynayo shacabkeeda, sidaa daraadeed waxba uma sheegi
karno waayo way ogyihiin wax walba,” ayuu yiri C/qaadir oo la weydiiyay
su’aal ah inay dowladda Soomaaliya la xiriireen si ay dhibaatadooda ugu
sheegaan.
Sidoo kale, wuxuu sheegay wiilkan inaysan garanayn wax ay sameeyaan
oo aan ka ahayn inay Kenya isaga baxaan oo ay dalkooda ku laabtaan
haddii ay fursad u helaan, wuxuuna xukuumadda Kenya ku eedeeyay inaysan
ogoleyn inay dalkooda ku celiso maxaabiistan.
Dhanka kale, gabar Soomaaliyeed oo lagu magacaabo Xaawo Maxamuud
Cabdi ayaa u sheegay BBC-da in ciidanka Kenya ay qabteen xili ay
doonaysay inay isaga baxdo Kenya, balse xabsiga ay u taxaabeen ayna ku
xiran tahay Kasarani muddo laba bilood ah.
“Halkaan waxaan ku jiraa laba bilood, noloshu aad ayay u xun tahay,
biyo ma jiraan, cunnana waxaan helnaa Ugaali (Soor) qalalan, taas ayaana
ku soonnaa tan iyo markuu ramadaanku dhashay, waayo waa waajib in
bishan la soomo, salaadna warkeeda daa… waayo biyo ma haysanno, xitaa
kaadida biyo aad isaga dhaqdo ma helaysid,” ayay tiri Xaawo.
Gabadhan Soomaaliyeed ayaa intaas ku dartay inaysan jirin cid ay la
xiriiri karaan, askartuna ay garaacaan markii ay weydiistaan taleefoon
ay kula xiriiraan ehelladooda.
“Dhibaato daran ayaa halkan nagu haysata, waxaana Alle ka rajeynayaa
in uu naga saaro xabsigan… ma jirto cid loo naxariisanayo… qof walbana
sidii la doono ayaa loola dhaqmaa,” ayay gabadhan hadalkeed ku dartay.
BBC-da oo arrintan kala hadashay danjiraha Somalia u fadhiya dalka
Kenya, Maxamed Cali Ameerika ayaa wuxuu sheegay in dadkaas ay yihiin
kuwo aan dalkan ku joojin sharci, balse ay wadaan qorshihii ay xabsigaas
uga saari lahaayeen maxaabiista Soomaaliyeed.
“Maxaabiis iyaga ka badan ayaan ugu tagnay oo aan ka saarnay, iyagana
waan ka saaraynaa… waxaase naloo sheegay inay yihiin dad loo haysto
inay sharci-darro dalkan ku joogeen, innaguna dowladda Kenya waxaan had
iyo goor ka codsanaa inaan la dhibaateyn Soomaalida loona fududeeyo in
dib loogu celiyo dalkooda kuwii aan sharci lahayn,” ayuu kaga jawaabay
su’aal ahayd inaysan maxaabiistaas sheegeen inaysan u imaan cid ka
dowladdooda ka socota.
Ugu dambeyn, danjire Ameerika ayaa sheegay in tirada dadka Soomaalida
ah ee ku jira Kasarani ay yihiin toddoba qof oo keliya, ayna la socdaan
sida uu xaalkoodu yahay, markii loo oglaado inay ka saaraan halkaasna
ay dib ugu celin doonaan dalkooda hooyo.
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 22:36 and have
