Saraakiisha ayaa sheegay in uu wali socdo howlgalka lagu qabanayo dableyda, isla markaana lagu badbaadinayo tiro aan la ogeyn  oo dad ah, kuwaas oo wali lagu haysto Westgate Mall oo ah halka weerarku uu ka dhacay maalintii shalay ahayd.

Madaxweynaha Kenya Uhuru Kenyatta oo weerarka ka dib dadka reer Kenya telefishnka kala hadlay, ayaa sheegay in dhibanayaasha loo cadaalad fali doono.

Dhiniciisa, Xoghayaha Arrimaha Gudaha ee Kenya Joseph Ole Lenku ayaa sheegay in dad ka badan kun qof laga soo daad gureeyey goobtii weerarku ka dhacay, isaga oo xaaladda ku sheegay mid “nugul.”

Waxa xoghayuhu sheegay in ay jiraan 10 ilaa 15 ka mid ah kooxdii weerarka soo qaadday, isaga oo sheegay in kooxdaasi ay sharciga hor iman doonaan.

Kooxda argagixisada ah ee Alshabab ayaa sheegtay mas’uuliyadda weerarka, iyaga oo sheegay inay ka aargoosanayaan ciidanka Kenya, galidii ay galeen dalka Somalia.

Afhayeenka ururka ayaa fariin maqal ah ku sheegay, isaga oo leh “Ama waddankaad nooga baxaysiin ama weerar joogto ah ayaad ku noolaaneysiin.”